Today Gujarati News (Desk)
દેશ અને દુનિયાભરમાં ઈદનો તહેવાર મનાવવામાં આવી રહ્યો છે. સેલિબ્રિટીઝ સોશિયલ મીડિયા પર ઈદની શુભકામનાઓ આપી રહ્યા છે. આ ખાસ અવસર પર શાહરૂખ ખાનના ચાહકોને આશા હતી કે તેમનો ફેવરેટ સ્ટાર મન્નતમાંથી બહાર આવીને એક ઝલક બતાવશે. શાહરૂખે તેમની આ ઈચ્છા પૂરી કરી દીધી છે અને તે ચાહકો માટે ઈદીથી ઓછી નથી. શાહરૂખ શનિવારના રોજ મન્નતની બાલ્કનીમાં આવ્યો હતો. તેણે બધાને જોઈને હાથ બતાવ્યો હતો. નાનો દીકરો અબરામ પણ તેની સાથે જ હતો. શાહરૂખની તસવીરો આવતાની સાથે જ સોશિયલ મીડિયા પર છવાઈ ગઈ છે.
સવારથી જ ઘરની બહાર ભીડ જામી હતી
શાહરૂખ ખાન મોટાભાગે દરેક મોટા તહેવાર અને તેના જન્મદિવસના અવસર પર મન્નતની બહાર આવે છે. તેથી આ વખતે પણ એવું માનવામાં આવતું હતું કે તે ઘરની બાલ્કનીમાં આવશે. આ કારણે સવારથી જ મન્નતની બહાર ચાહકોની ભારે ભીડ જામી હતી. ચાહકો માત્ર એક વાર પોતાના ચહિતા સ્ટારને જોવા માંગતા હતા. આ પ્રસંગે શાહરૂખ કેઝ્યુઅલ લુકમાં જોવા મળ્યો હતો. તેણે સફેદ ટી-શર્ટ સાથે બ્લેક ડેનિમ પહેર્યું હતું. તેમજ સનગ્લાસ પહેરેલા હતા. થોડીવાર માટે અબરામ પણ બાલ્કનીમાં આવ્યો હતો. ઈદ પર અબરામે સફેદ રંગનો કુર્તા પાયજામા પહેર્યો હતો. મન્નતની બહાર એટલી ભીડ એકઠી થઈ ગઈ હતી કે પોલીસ પણ સ્થળ પર હાજર હતી.
