Today Gujarati News (Desk)
ગોંડલ-રાજકોટ નેશનલ હાઈવે પર મોડી રાત્રે ટ્રક પાછળ ટેમ્પો ઘૂસી જતા અકસ્માતની ઘટના બની હતી. આ ઘટનામાં બે યુવકોના ઘટના સ્થળે જ મોત નિપજ્યા હતા. તેમાં ધોરાજીના યુવાનની ઓળખ થવા પામી હતી, જ્યારે અન્ય યુવાનની ઓળખ મેળવવા પોલીસે તપાસ હાથ ધરી હતી.આ અકસ્માતની વધુ વિગત પ્રમાણે ધોરાજીથી ટેમ્પોમાં ટમેટા ભરીને મોહસીન હાજી અને રફિકભાઈ મોતીવાલા રાજકોટ આવી રહ્યાં હતા. આ બંને યુવકો સાથે અન્ય બે યુવકો પણ સાથે આવી રહ્યા હતા. આ ટેમ્પો ગોંડલ-રાજકોટ નેશનલ હાઈવે પર બીલીયાળા ગામના પાટિયા નજીક પહોંચ્યો હતો ત્યારે ત્યાં ઉભેલા એક ટ્રક પાછળ ધડાકાભેર ઘૂસી ગયો હતો. આ અકસ્માત એટલો ગંભીર હતો કે બે યુવકોના ઘટના સ્થળે જ મોત થયા હતા.
સુત્રોમાંથી મળતી માહિતી મુજબ આ ઘટના રાત્રે 2 વાગ્યાની આસપાસ બની હતી. આ ઘટનાની જાણ પોલીસને થતા પોલીસ ઘટના સ્થળે પહોંચી હતી. આ બનાવને પગલે થોડા સમય માટે હાઈવે પર ટ્રાફિક જામ થયો હતો. બંને મૃતદેહોને પીએમ અર્થે ખસેડવામાં આવ્યા હતા અને પોલીસે આગળની કાર્યવાહી હાથ ધરી હતી.
