Today Gujarati News (Desk)
ગ્રેટર નોઈડામાં ગૌર સિટીમાં એક બહુમાળી બિલ્ડીંગમાં આગ લાગવાની ઘટના સામે આવી છે. ફાયર વિભાગની ગાડીઓ ઘટના સ્થળે પહોંચી છે. ફાયર વિભાગની ટીમ દ્વારા આગ પર કાબૂ મેળવવાનો પ્રયાસ થઈ રહ્યો છે.
આજે ગ્રેટર નોઈડાની ગૌર સિટી સોસાયટીમાં 14મી એવન્યુ પર આગ લાગવાથી ઘટના બની છે. આ બહુમાળી બિલ્ડીંગના પહેલા માળે ભીષણ આગ ફાટી નીકળી હતી. ફાયર વિભાગને જાણ કરવામાં આવતા જ ફાયર ગાડીઓ ઘટના સ્થળ પર પહોંચીને આગ પર કાબુ મેળવવાનો પ્રયાસ કરી રહ્યા છે. હાલ કોઈ જાનહાનિના સમાચાર મળ્યા નથી. આગ લાગતા જ સમગ્ર સોસાયટીમાં અફરાતફરીનો માહોલ સર્જાયો હતો અને લોકો ઘરની બહાર દોડી ગયા હતા. આ સાથે જ પોલીસ અને ફાયર વિભાગ રાહત અને બચાવ કામગીરી કરી રહ્યા છે.
આ ઘટના લગભગ 11:45 વાગ્યે બની હતી. આગ લાગી ત્યારે ફ્લેટમાં કોઈ હાજર ન હતું જેથી મોટી દુર્ઘટના ટળી હતી. આગ લાગવાનું કારણ શોર્ટ સર્કિટ હોવાનું કહેવામાં આવી રહ્યુ છે. ફ્લેટમાંથી આગની જ્વાળા જોતા સોસાયટીના લોકોએ બિલ્ડર મેનેજમેન્ટ સહિત ફાયર વિભાગને જાણ કરી હતી. આ સાથે સોસાયટીના લોકો આગ પર કાબુ મેળવવાનો પ્રયત્ન કર્યો હતો. ફ્લેટના તાળા લગાવેલા હોવાના કારણે લોકોને આગ પર કાબુ મેળવવામાં ભારે મુશ્કેલીનો સામનો કરવો પડ્યો હતો. બિલ્ડર મેનેજમેન્ટે સોસાયટીમાં લગાવેલા ફાયર ફાઇટિંગ સાધનોની મદદથી આગને કાબુમાં લેવાના પ્રયાસ કર્યા હતા.
