Today Gujarati News (Desk)
પટનામાં રિફાઈન્ડ ઓઈલના ગોડાઉનમાં આજે સવારે ભીષણ આગ લાગી ગઈ હતી. આગના કારણે સમગ્ર વિસ્તારમાં અફરાતફરીનો માહોલ સર્જાયો છે. આગની જ્વાળા એટલી જોરદાર હતી કે, તેણે બીજા પણ બે ગોડાઉનને પોતાની લપેટમાં લઈ લીધા હતા. આખું રિફાઈન્ડ ઓઈલ અને ટ્રાન્સપોર્ટ ગોડાઉન આગની લપેટમાં આવી ગયુ છે. લોકો પોતાના ઘરોમાંથી જોર જોરથી બૂમો પાડવા લાગ્યા હતા.
ફાયર બ્રિગેડની 12 ગાડી ઘટના સ્થળે
આજુ બાજુના લોકોને જાણ થતા જ તેમણે આ ચોક અંગે પોલીસ સ્ટેશનમાં જાણ કરી હતી. સ્થાનિક લોકોની ફરિયાદ છે કે, પોલીસ સૂચના મળ્યાના અડધા કલાકથી પણ વધુ સમય બાદ ઘટનાસ્થળે પહોંચી હતી. ઘટનાસ્થળે પહોંચ્યા બાદ પોલીસે ફાયર બ્રિગેડને જાણ કરી હતી. માહિતી મળતાં જ ફાયરની 12 ગાડીઓ ઘટનાસ્થળે પહોંચી ગઈ હતી. રિફાઈન્ડ ગોડાઉન અને ટ્રાન્સપોર્ટ ગોડાઉનમાં લાગેલી આગને કાબૂમાં લેવાના પ્રયાસો હાથ ધરાયા હતા.
આ બાબતે ચોક પોલીસ સ્ટેશનના ઈન્ચાર્જ ગૌરીશંકર ગુપ્તાએ જણાવ્યું હતું કે, આગ લાગવાનું કારણ હજુ સ્પષ્ટ નથી થયું. તેમણે કહ્યું કે તેમની પ્રથમ પ્રાથમિકતા કોઈ પણ રીતે આગ પર કાબૂ મેળવવાની છે. એક પ્રશ્નના જવાબમાં તેમણે જણાવ્યું હતું કે, આગના કારણે કેટલું નુકસાન થયું છે તેનો હાલ અંદાજ લગાવી શકાય તેમ નથી. પ્રાપ્ત માહિતી પ્રમાણે આ રિફાઈન્ડ ગોડાઉન રાજુ કુમારનું હતું જે આગથી સંપૂર્ણ રીતે નાશ પામ્યું છે.
