Today Gujarati News (Desk)
નવી દિલ્હી: જે રીતે બોલિવૂડની ફિલ્મો ગયા વર્ષે બોક્સ ઓફિસ પર સતત ફ્લોપ રહી હતી, હવે લાગે છે કે આ કહાની ધીમે ધીમે બદલાવાની છે. હા, આ વર્ષની શરૂઆત બોલિવૂડ માટે સારી સાબિત થઈ શકે છે. આજે (25 જાન્યુઆરી) બોલિવૂડના ‘બાદશાહ’ શાહરૂખ ખાનની વિશ્વભરના સિનેમાઘરોમાં રિલીઝ થયેલી મોસ્ટ અવેટેડ ફિલ્મ ‘પઠાણ’એ સોશિયલ મીડિયા પર ધૂમ મચાવી દીધી છે. ફિલ્મને લઈને સારા રિવ્યુ મળી રહ્યા છે. ફિલ્મ સમીક્ષક તરણ આદર્શે ‘પઠાણ’ને 4.5 રેટિંગ આપ્યું છે અને ફિલ્મને બ્લોકબસ્ટર ગણાવી છે. આવી સ્થિતિમાં હવે સૌની નજર ફિલ્મના પ્રથમ દિવસનાં બોક્સ ઓફિસ પરના કલેક્શન પર છે.
અમુક અહેવાલો અનુસાર, ફિલ્મ ‘પઠાણ’નું એડવાન્સ બુકિંગ 30 કરોડને પાર કરી ચૂક્યું છે. આટલા ઊંચા એડવાન્સ બુકિંગ સાથે, ટ્રેડ એનાલિસ્ટો અપેક્ષા રાખે છે કે ફિલ્મ રૂ. 35 કરોડથી વધુની કમાણી કરશે.
તારણ આદર્શે કરેલા એક ટ્વિટ મુજબ ફિલ્મે 25 કરોડની કમાણી તો પ્રથમ દિવસે માત્ર મોટા મોટા થિયેટર્સમાંથી જ કરી લીધી છે. આ સિવાય નાના થિયેટર્સની કમાણી તો અલગ.
નિર્માતા અને વેપાર વિશ્લેષક ગિરીશ જોહરે ETimes ને જણાવ્યું હતું કે, ‘પઠાણે માત્ર ભારતમાં જ નહીં પરંતુ સમગ્ર વિશ્વમાં ચાહકોમાં ભારે લોકચાહના પેદા કરી છે. તેમણે કહ્યું હતું કે આ એક સારી શરૂઆત છે. મને 35 થી 37 કરોડની વચ્ચે ઓપનિંગની અપેક્ષા છે. જો શરૂઆત આ સૌથી સારી શરૂઆત કહી શકાય આ સંજોગોમાં.
જ્યારે ટ્રેડ એનાલિસ્ટ કોમલ નાહટા કહે છે, “પહેલા દિવસે ‘પઠાણ’નું કુલ કલેક્શન 22 કરોડ માત્ર PVR, Inox અને Cinepolis તરફથી સાંજે 4.30 વાગ્યા સુધી છે અને ફિલ્મ 50 કરોડની ઓપનિંગ માટે તૈયાર છે.”
ફિલ્મમાં સલમાન ખાનનો કેમિયો પણ ઘણો પસંદ કરવામાં આવી રહ્યો છે. લોકો સોશિયલ મીડિયા પર સલમાનના નાના રોલની પ્રશંસા કરી રહ્યા છે. મીડિયા રિપોર્ટ્સ અનુસાર આ ફિલ્મમાં સલમાન ‘ટાઈગર’ના રોલમાં છે.
ફિલ્મ ‘પઠાણ’નું કલેક્શન ભલે ગમે તેટલું હોય, પરંતુ શાહરૂખના કરિયર માટે આ એક મોટી ફિલ્મ છે, કારણ કે 4 વર્ષ પહેલા જ્યારે શાહરૂખ ‘ઝીરો’માં મોટા પડદા પર દેખાયો હતો ત્યારે લોકોએ તેની ફિલ્મને સાવ રિજેક્ટ કરી દીધી હતી અને ફિલ્મ ફ્લોપ થઈ ગઈ હતી.
શાહરૂખને તેની ફિલ્મ ‘પઠાણ’ પાસેથી ઘણી આશાઓ રાખી હશે, કારણ કે તેણે આ ફિલ્મ માટે ઘણી મહેનત કરી છે. તમને જણાવી દઈએ કે, આ ફિલ્મમાં શાહરૂખની સાથે દીપિકા પાદુકોણ લીડ એક્ટ્રેસના રોલમાં જોવા મળી રહી છે અને તે દર્શકો માટે કોઈ ટ્રીટથી ઓછી નથી, કારણ કે શાહરૂખ અને દીપિકાની જોડીને દર્શકો તરફથી ઘણો પ્રેમ મળ્યો છે. વિલન તરીકે આ ફિલ્મમાં જ્હોન અબ્રાહમ પણ મહત્વના રોલમાં જોવા મળશે.
