Today Gujarati News (Desk)
બોક્સ ઓફિસ પર એક વખત ફરીથી સાઉથની હિન્દી રિમેક આવી રહી છે. જો કે, ટ્વિસ્ટ એ છે કે આ વખતે બોલિવુડ એક્ટર નહી પરંતુ સાઉથ ઈન્ડિયન સિનેમાના પ્રખ્યાત અભિનેતા બેલ્લમકોંડા સાઈ શ્રીનાવાસ સાઉથની ફિલ્મની હિન્દી રિમેક લઈને આવી રહ્યા છે. મળતી માહિતી અનુસાર, શ્રીનવાસ વર્ષ 2005માં એસએસ રાજામૌલી અને પ્રભાસની સુપરહિટ ફિલ્મ ‘છત્રપતિ’ની હિન્દી રિમેક દ્વારા બોલિવૂડમાં ડેબ્યૂ કરવા જઈ રહ્યો છે. સોમવારના રોજ ટ્રેડ એનાલિસ્ટ તરણ આદર્શે સોશિયલ મીડિયા પર ફિલ્મનું પહેલું પોસ્ટર રિલીઝ કરતી વખતે આ માહિતી આપી છે.
બોક્સ ઓફિસ પર ટક્કર થશે
પેન સ્ટુડિયો દ્વારા નિર્દેશિત આ ફિલ્મ આ વર્ષે 12 મેના રોજ સિનેમાઘરોમાં આવશે. ‘છત્રપતિ’ની હિન્દી રિમેકનું નિર્દેશન વીવી વિનાયક કરી રહ્યા છે. તમને જણાવી દઈએ કે, બોક્સ ઓફિસ પર સાઉથની હિન્દી રિમેક અને રણદીપ હુડાની ફિલ્મ ‘સ્વતંત્રવીર સાવરકર’ વચ્ચે ટક્કર થવા જઈ રહી છે. રણદીપ હુડ્ડાની આ ફિલ્મ 16 મેના રોજ દેશભરના સિનેમાઘરોમાં રિલીઝ થવાની છે.
‘છત્રપતિ’ સિવાય આ રિમેક ફિલ્મો સિનેમાઘરોમાં આવવાની છે
બોલિવૂડ એક્ટર અજય દેવગનની ફિલ્મ ‘ભોલા’ 30 માર્ચના રોજ રિલીઝ થઈ રહી છે. તમને જણાવી દઈએ કે, આ તમિલ ફિલ્મ ‘કૈથી’ની હિન્દી રિમેક છે. બીજી બાજુ 7મી એપ્રિલના રોજ આવી રહેલી આદિત્ય રોય કપૂરની ફિલ્મ ‘ગુમરાહ’ તમિલ ફિલ્મ ‘થડમ’ની સત્તાવાર રિમેક છે. આ ઉપરાંત, અક્ષય કુમારની ‘અનટાઈટલ્ડ’ ફિલ્મ જે સપ્ટેમ્બરમાં રિલીઝ થવાની છે તે તમિલ ફિલ્મ ‘સૂરારાઈ પોટ્રુ’ની રિમેક છે.
