Today Gujarati News (Desk)
દિલ્હીના પૂર્વ ઉપમુખ્યમંત્રી મનીષ સિસોદિયા હાલમાં તિહાર જેલમાં બંધ છે. આ દરમિયાન હોળીની સાંજે 8 માર્ચના રોજ તેમના સત્તાવાર ટ્વિટર હેન્ડલ પરથી એક ટ્વિટ કરવામાં આવી હતી, જેણે હવે રાજકીય વર્તુળોમાં ખળભળાટ મચાવી દીધો છે. આ ટ્વિટને લઈને ભાજપે સિસોદિયા સહિત આપ પાર્ટી સામે આકરા પ્રહારો કર્યા છે. તેમના પર જેલમાં મોબાઈલનો ઉપયોગ કરવાનો આરોપ લાગ્યો છે.
મનીષ સિસોદિયાના આ ટ્વિટમાં લખ્યું છે કે, ‘આજ સુધી સાંભળ્યું હતું કે જ્યારે દેશમાં શાળાઓ ખુલે છે તો જેલો બંધ થઈ જાય છે; પરંતુ હવે આ લોકોએ દેશમાં શાળાઓ ખોલનારાઓને જ જેલમાં ધકેલવાનું શરૂ કર્યું છે. મનીષ સિસોદિયાના આ ટ્વિટથી ભાજપને તેમની સામે સવાલ ઉઠાવવાની તક મળી ગઈ છે. જોકે એવું માનવામાં આવે છે કે સિસોદિયાનું આ એકાઉન્ટ તેમની સોશિયલ મીડિયા ટીમ અથવા તેમની પત્ની દ્વારા હેન્ડલ કરવામાં આવી રહ્યું છે. આ ટ્વિટ પણ બંનેમાંથી કોઈ એક દ્વારા કરવામાં આવ્યું હોઈ શકે છે. જો કે આ અંગે આમ આદમી પાર્ટી તરફથી હજુ સુધી કોઈ સ્પષ્ટતા કરવામાં આવી નથી.
