વડાપ્રધાન મોદી આવશે ગુજરાત, ઓસ્ટ્રેલિયાના પીએમ સાથે અમદાવાદમાં જોશે ક્રિકેટ મેચ – PM Modi in Gujarat

Today Gujarati News (Desk)

અમદાવાદઃ વડાપ્રધાન નરેન્દ્ર મોદી ફરી એકવાર ગુજરાતના મહેમાન બનવાના છે. ચાલુ અઠવાડિયા દરમિયાન તેઓ ગુજરાત આવી રહ્યા છે. વડાપ્રધાન મોદીની સાથે ઓસ્ટ્રેલિયાના પીએમ એન્થની એલ્બનિઝ  પણ અમદાવાદના મહેમાન બનવાના છે. આ બન્ને દેશોના વડા નરેન્દ્ર મોદી સ્ટેડિયમમાં સાથે બેસીને ભારત-ઓસ્ટ્રેલિયા વચ્ચે રમાનારી ચોથી ટેસ્ટ મેચ નિહાળવાના છે. ધુળેટીની રાત્રે વડાપ્રધાન અમદાવાદ પહોંચશે અને બીજા દિવસે મેચ જોવા માટે જવાના છે.

નોંધનીય છે કે ભારત-ઓસ્ટ્રેલિયા વચ્ચે ચાલી રહેલી સિરીઝમાં ભારત 2-1થી આગળ છે અને અમદાવાદમાં બન્ને દેશો વચ્ચે સિરીઝની અંતિમ ટેસ્ટ મેચ રમાવાના છે.

વડાપ્રધાન મોદી તારીખ 8 માર્ચે રાત્રે અમદાવાદ પહોંચવાના છે. અહીંથી તેઓ સીધા ગાંધીનગર જશે, ગાંધીનગરમાં તેઓ રાજભવનમાં રાત્રી રોકાણ કરવાના છે.