Today Gujarati News (Desk)
વડોદરા: શહેરના અટલાદર પાદરા રોડ પર ગમખ્વાર અકસ્માત સર્જાયો હતો. રીક્ષા અને કાર વચ્ચે સર્જાયેલા અકસ્માતમાં 5 લોકોના મોત થયા છે. અકસ્માતમાં ત્રણ બાળકો અને પતિ-પત્નીના મોત નિપજ્યા છે. આ ગમખ્વાર અકસ્માત સર્જાતા ઘટના સ્થળે જ ત્રણ લોકોનાં મોત થયા હતા, જ્યારે બે લોકોના હોસ્પિટલમાં સારવાર દરમિયાન મોત થયા હતા. તમામના મૃતદેહ સયાજી હોસ્પિટલ ખસેડાયા છે.
ગઇકાલે મોડીરાત્રે વડોદરા શહેરના અટલાદર પાદરા રોડ પર અકસ્માત સર્જાયો હતો. મળતી માહિતી અનુસાર, વડોદરાનો રહેવાસી નાયક પરિવાર સોખડા ખાતે લગ્ન પ્રસંગે હાજરી આપવા ગયો હતો. ત્યાંથી પરત ફરતી વખતે અકસ્માત સર્જાયો હતો. જેમાં પરિવારના તમામ સભ્યોના મોત થયા હતા.
અકસ્માતને પગલે મોટી સંખ્યામાં રાહદારીઓ એકઠા થઈ ગયા હતા અને અકસ્માતની જાણ પોલીસને કરવામાં આવી હતી. જે બાદ પોલીસની ટીમ ઘટના સ્થળે દોડી આવી હતી. આ ભયાનક અકસ્માતમાં ત્રણ લોકોના ઘટના સ્થળે જ મોત નિપજ્યાં હતા. જ્યારે બે બાળકોને સારવાર અર્થે શહેરની એસએસજી હોસ્પિટલ ખાતે ખસેડવામાં આવ્યા હતા. જ્યાં સારવાર દરમિયાન તેમનું મોત નિપજ્યું હતું.
રિક્ષામાં સવાર પરિવારને કાળ ભરખી ગયો છે. આ અકસ્માતમાં 3 બાળકો અને પતિ-પત્નીના મોત થયા છે. રિક્ષા અને કાર વચ્ચે સર્જાયેલા આ અકસ્માતમાં 5 લોકોના મોત થયા છે.
મૃતકોમાં અરવિંદ પૂનમ નાયક, કાજલ અરવિંદ નાયક, શિવાની અલ્પેશ નાયક, ગણેશ અરવિંદ નાયક અને દ્રષ્ટિ અરવિંદ નાયકનો સમાવેશ થાય છે. પોલીસ દ્વારા હાલ તમામના મૃતદેહોને પોસ્ટમોર્ટમ અર્થે ખસેડવામાં આવ્યા છે.
