બોલિવુડના જાણીતા ફેશન ડિઝાઈનર રોહિત બલની તબિયત હાલ નાજુક છે. તેઓ ગુરુગ્રામની મેદાંત હોસ્પિટલમાં જીવન-મરણ વચ્ચે ઝોલા ખાઈ રહ્યા છે. ડિઝાઈનરની હાલત અત્યંત ગંભીર હોવાનું કહેવામાં આવી રહ્યું છે. હાલ તેઓ આઈસીયુમાં દાખલ છે. ગયા વર્ષે નવેમ્બર મહિનામાં પણ તેઓ ખૂબ બીમાર પડ્યા હતા અને આ જ હોસ્પિટલમાં દાખલ કરવામાં આવ્યા હતા. રોહિત બલનું હાર્ટ ફેઈલ થતાં તેમને સોમવારે સાંજે વેન્ટિલેટર સપોર્ટ પર મૂકવામાં આવ્યા છે.
ડૉક્ટરોના કહેવા પ્રમાણે, 61 વર્ષીય રોહિત બલને હોસ્પિટલમાં દાખલ કરવામાં આવ્યા ત્યારે તેઓ ડાયલેટેડ કાર્ડિયોમાયોપથી, બેકાબૂ ડાયાબિટીસ અને એક્યુટ કિડની ફેલ્યોર જેવી સ્થિતિથી પીડાઈ રહ્યા હતા. હોસ્પિટલના સૂત્રોનું માનીએ તો રોહિત બલની હાલત ક્રિટિકલ છે. તેઓ ડૉ. પ્રવીણ ચંદ્રની દેખરેખ હેઠળ સારવાર લઈ રહ્યા છે.
હોસ્પિટલના સૂત્રોનું કહેવું છે કે, “રોહિત બલને છાતીમાં તીવ્ર વેદના થઈ હતી જેથી તેમને તાત્કાલિક હોસ્પિટલ ખસેડવામાં આવ્યા હતા. જ્યાં ડૉક્ટરોએ કેટલાક ટેસ્ટ કરતાં ખબર પડી કે, તેઓ ડાયલેટેડ કાર્ડિયોમાયોપથીથી પીડાઈ રહ્યા છે.
આ એવી સ્થિતિ છે જેમાં હૃદયના સ્નાયુઓએ નબળા અને પહોળા થઈ જાય છે. પરિણામે હૃદય આખા શરીર સુધી યોગ્ય રીતે લોહી નથી પહોંચાડી શકતું. અન્ય જૂની બીમારીઓ પણ ડાયલેટેડ કાર્ડિયોમાયોપથી માટે જવાબદાર હોઈ શકે છે.”
ગત વર્ષે નવેમ્બર મહિનામાં પણ રોહિત બલની તબિયત બગડતાં મેદાંતામાં સારવાર કરવામાં આવી હતી. ફેબ્રુઆરી 2010માં તેમને હાર્ટ અટેક આવતાં તાત્કાલિક એન્જિયોપ્લાસ્ટી કરવામાં આવી હતી. રોહિત બલ બોલિવુડમાં ગુડ્ડાના નામે જાણીતા છે. તેમના કપડામાં કમળ અને મોરના મોટા ચિત્રો જોવા મળે છે. ઉપરાંત તેઓ કાશ્મીરી કળાનો પ્રચાર કરતાં જોવા મળે છે. રોહિત બલ કાશ્મીરના છે અને તેમણે દિલ્હીમાં અભ્યાસ કર્યો છે. સેન્ટ સ્ટીફન કોલેજમાંથી ગ્રેજ્યુએશન કર્યા પછી તેમણે NIFTમાંથી ફેશન ડિઝાઈનિંગનો કોર્સ કર્યો છે.
રોહિત બલે ઐશ્વર્યા રાયથી લઈને પરિણીતી ચોપરા, પૂજા હેગડે સહિત બોલિવુડના કેટલાય સેલેબ્સ માટે કપડા તૈયાર કર્યા છે. ઉપરાંચ પામેલા એન્ડરસન, ઉમા થુરમ, નાઓમી કેમ્પબેલ, સિંડી ક્રોફર્ડ જેવા હોલિવુડ સેલેબ્સ માટે પણ કામ કર્યું છે.
