સુપ્રીમ કોર્ટે કેન્દ્ર સરકાર દ્વારા પોલીસ અને કેન્દ્રીય એજન્સીઓના વ્યક્તિગત ડિજિટલ ઉપકરણોની શોધ અને જપ્તી માટે માર્ગદર્શિકા ઘડવામાં વિલંબ પર નારાજગી વ્યક્ત કરી હતી.
કેન્દ્ર સરકારે માર્ગદર્શિકા તૈયાર કરવા માટે વધુ સમયની જરૂરિયાત વ્યક્ત કરી હતી. એડિશનલ સોલિસિટર જનરલ (ASG) SV રાજુએ જસ્ટિસ સંજય કિશન કૌલ અને જસ્ટિસ સુધાંશુ ધુલિયાની બેંચને જણાવ્યું કે આ સંદર્ભે એક કમિટી બનાવવામાં આવી છે. કેન્દ્ર સરકારને માર્ગદર્શિકા તૈયાર કરવા માટે વધુ સમયની જરૂર પડશે. તેમણે કહ્યું કે કામ સકારાત્મક રીતે ચાલી રહ્યું છે.
જો કે, જસ્ટિસ કૌલે આવા નિર્દેશોની માંગ કરતી અરજી દાખલ કરવામાં આવી ત્યારથી સરકાર તરફથી બે વર્ષના વિલંબ પર સવાલ ઉઠાવ્યા હતા. જસ્ટિસ કૌલે કહ્યું કે અમે નોટિસ ક્યારે જારી કરી? બે વર્ષ વીતી ગયા. અમુક સમયમર્યાદાઓનું પાલન કરવું પડશે.
સુપ્રીમ કોર્ટે 2022માં જવાબ દાખલ કરવા જણાવ્યું હતું
ઓગસ્ટ 2022 માં, સુપ્રીમ કોર્ટે કેન્દ્ર સરકારને શિક્ષણવિદોની અરજી પર ફરીથી તેનો જવાબ દાખલ કરવા કહ્યું હતું કારણ કે તેનું કાઉન્ટર એફિડેવિટ અધૂરું અને અસંતોષકારક હતું. નવેમ્બર 2022 માં, કોર્ટે જવાબ દાખલ ન કરવા બદલ સરકાર પર 25,000 રૂપિયાનો દંડ પણ લગાવ્યો હતો.
આગામી સપ્તાહ સુધીમાં માર્ગદર્શિકા તૈયાર થઈ જશેઃ કેન્દ્ર
બુધવારે સુનાવણી દરમિયાન, અરજદારોના વકીલ નિત્યા રામક્રિષ્નને માર્ગદર્શિકાની તાત્કાલિક જરૂરિયાત પર ભાર મૂક્યો હતો. દિશાનિર્દેશો ઘડવા અંગે સરકારની ખાતરીઓ પર શંકા વ્યક્ત કરતી વખતે કોર્ટે પરિસ્થિતિની ગંભીરતાને સ્વીકારી હતી.
જોકે, એએસજી રાજુએ કોર્ટને ખાતરી આપી હતી કે આગામી સપ્તાહ સુધીમાં માર્ગદર્શિકા તૈયાર થઈ જશે. આ પછી, કોર્ટે રાજુને તે પૂર્ણ કરવાનો નિર્દેશ આપ્યો અને આ બાબતને 14 ડિસેમ્બરે સૂચિબદ્ધ કરવાનો આદેશ આપ્યો.
