Kutch: કચ્છ જિલ્લાના પધ્ધર નજીક ગમખ્વાર અકસ્માત સર્જાયો છે. ભુજ-ભચાઉ હાઇવે પર મુસાફરો ભરેલી તૂફાન પુલના ડિવાઇડરમાં ઘૂસી ગઇ હતી. આ અકસ્માતમાં ઘટના સ્થળે જ 3 લોકોના કમકમાટીભર્યા મોત નિપજ્યા છે, જ્યારે 5થી વધુ લોકો ઘાયલ થયાં છે. ઘાયલોને સારવાર અર્થે હોસ્પિટલ ખસેડવામાં આવ્યાં છે. જેમાંથી કેટલાંક લોકોની હાલત નાજુક હોવાની જાણકારી મળી રહી છે.
અકસ્માત બાદ સ્થાનિક લોકો મદદ માટે આવી પહોંચ્યા હતાં અને 108ને ફોન કરીને ફોન કર્યો હતો. સ્થાનિકોએ ગાડીમાં ફસાયેલા લોકોને બહાર કાઢવામાં મદદ કરી હતી. અકસ્માત એટલો ભયાનક હતો કે તૂફાન ગાડીનો કચ્ચરઘાણ નીકળી ગયો છે. જો કે હજુ સુધી અકસ્માત પાછળનું કારણ સામે આવ્યુું નથી. આ સાથે જ પોલીસે અકસ્માત પાછળનું કારણ જાણવાની પણ તજવીજ હાથ ધરી છે.
અકસ્માતને પગલે સ્થાનિક પોલીસ ઘટના સ્થળે દોડી આવી હતી અને મૃતકોને પીએમ અર્થે હોસ્પિટલ ખસેડી વધુ તપાસ હાથ ધરી હતી. જણાવી દઇએ કે, મૃતકોની ઓળખ હજુ સુધી થઇ શકી નથી. મૃત્યુ પામેલા લોકોના મૃતદેહ પોસ્ટમોર્ટમ માટે મોકલી આપવામાં આવ્યાં છે. પોસ્ટમોર્ટમ બાદ પોલીસ ઓળખ કરીને મૃતદેહ તેમના પરિવારજનોને સોંપશે.
