Lok Sabha Election 2024: કેન્દ્રીય ગૃહમંત્રી અને ભાજપના ઉમેદવાર અમિત શાહ ગુરુવારે ગાંધીનગરમાં ત્રણ રોડ શો કરશે અને રેલીને સંબોધશે. આ પછી શાહ શુક્રવારે ગાંધીનગર લોકસભા બેઠક પરથી ઉમેદવારી નોંધાવશે. કેન્દ્રીય ગૃહમંત્રી બુધવારે ગુજરાત પહોંચ્યા હતા.
તેમણે ગાંધીનગર સંસદીય બેઠક હેઠળની લગભગ અડધો ડઝન વિધાનસભા બેઠકો પર ગુરુવારે યોજાનાર તેમના વિજય શંખનાદ રોડ શોની તૈયારીઓની સમીક્ષા કરી હતી. તેઓ 19મી એપ્રિલે બપોરે વિજય મુહૂર્તમાં ઉમેદવારી નોંધાવશે. ભાજપે શાહને આ બેઠક પરથી 10 લાખ મતોના માર્જિનથી ચૂંટણી જીતાડવાનું લક્ષ્ય રાખ્યું છે. શાહ ગુરુવારે સાણંદ, કલોલ, સાબરમતી, ઘાટલોડિયા, નારણપુરા અને વેજલપુર વિધાનસભા ક્ષેત્રમાં વિજય શંખનાદ રોડ શો કરશે.
ભાજપે બુધવારે આ જાણકારી આપી. રોડ શોને ભવ્ય બનાવવા માટે આ તમામ બેઠકોના ધારાસભ્યો અને અમદાવાદ અને ગાંધીનગર ભાજપના જિલ્લા સંગઠન દ્વારા જોરશોરથી તૈયારીઓ કરવામાં આવી રહી છે. રાજ્યની તમામ 26 લોકસભા બેઠકો માટે 7 મેના રોજ મતદાન થશે. નોમિનેશનની છેલ્લી તારીખ 19 એપ્રિલ છે.
શાહ રાજપૂત નેતાઓને મળી શકે છે
પોતાના વ્યસ્ત પ્રવાસ વચ્ચે અમિત શાહ કેન્દ્રીય મંત્રી પરશોત્તમ રૂપાલાથી નારાજ રાજપૂત સમાજના નેતાઓને મળી શકે છે. રાજપૂત સમાજની વિવિધ સંસ્થાઓની સંકલન સમિતિ અને કરણી સેનાના અધિકારીઓ હજુ પણ રૂપાલાની ટિકિટ કાપવા પર મક્કમ છે. ગાંધીનગરમાં મુખ્યમંત્રી ભૂપેન્દ્ર પટેલ અને ગૃહ રાજ્યમંત્રી હર્ષ સંઘવીએ રાજપૂત આગેવાનો સાથે વાટાઘાટો કરી છે, પરંતુ રૂપાલાના નામાંકન બાદ પણ રાજપૂત આગેવાનો પોતાની માંગ પર અડગ છે. શાહ તેમની મુલાકાત દરમિયાન રાજપૂત નેતાઓને મળીને મનાવી શકે છે.
દરમિયાન, ભાજપના ગુજરાત એકમના પ્રવક્તા યજ્ઞેશ દવેએ જણાવ્યું હતું કે, “ગૃહમંત્રી શાહ તેમનો પહેલો રોડ શો અમદાવાદ જિલ્લાના સાણંદ શહેરમાં અને બીજો ગાંધીનગર જિલ્લાના કલોલ શહેરમાં કરશે. તેમનો ત્રીજો રોડ શો અમદાવાદ શહેરમાં યોજાશે, જેમાં ઘાટલોડિયા, નારણપુરા અને વેજલપુર જેવા વિસ્તારો સામેલ થશે.
તેમણે કહ્યું કે ગાંધીનગર લોકસભા બેઠક પરથી ફરી એકવાર ચૂંટણી લડી રહેલા ભાજપના વરિષ્ઠ નેતા શાહ શુક્રવારે ઉમેદવારી પત્ર ભરશે. દવેએ જણાવ્યું કે રોડ શો કર્યા બાદ શાહ અમદાવાદ શહેરના વેજલપુર વિસ્તારમાં ચૂંટણી રેલીને સંબોધશે. શાહ બુધવારે અમદાવાદ પહોંચ્યા હતા અને તેમના ચૂંટણી પ્રચારનું સંચાલન કરનારાઓ સાથે બેઠકો કરી હતી.
