જમ્મુ-કાશ્મીરના પૂર્વ મુખ્યમંત્રી અને નેશનલ કોન્ફરન્સના પ્રમુખ ફારૂક અબ્દુલ્લાએ પાકિસ્તાન અધિકૃત કાશ્મીર (POK)ને લઈને રક્ષા મંત્રી રાજનાથ સિંહના નિવેદન પર પ્રતિક્રિયા આપી છે. અબ્દુલ્લાએ કહ્યું કે પાકિસ્તાન ચૂપ નહીં બેસે અને તેની પાસે પરમાણુ બોમ્બ પણ છે, જે આપણા પર પડશે.
વાસ્તવમાં, રવિવારે ન્યૂઝ એજન્સી સાથે વાત કરતા રાજનાથ સિંહે કહ્યું હતું કે બળજબરીથી PoK પર કબજો કરવાની જરૂર નથી. ત્યાંના લોકો પોતે ભારતમાં જોડાશે.
તેના જવાબમાં ફારુક અબ્દુલ્લાએ કહ્યું, ‘જો રક્ષા મંત્રી આવું કહેતા હોય તો આગળ વધો. આપણે કોણ રોકવાના? પણ યાદ રાખો, પાકિસ્તાને બંગડીઓ પહેરી નથી. તેમની પાસે પરમાણુ બોમ્બ છે અને કમનસીબે તે આપણા પર પડશે.
અબ્દુલ્લાની આ ટિપ્પણીથી ખળભળાટ મચી ગયો છે. ભાજપના નેતાએ તેમના પર પાકિસ્તાનની ભાષા બોલવાનો આરોપ લગાવ્યો છે. ભાજપના નેતા સુધાંશુ ત્રિવેદીએ કહ્યું કે ઈન્ડિયા બ્લોકના નેતાઓ પર પાકિસ્તાનની છાપ છે. ત્રિવેદીએ કહ્યું કે અત્યાર સુધી પાકિસ્તાનના કટ્ટરપંથી નેતાઓ પરમાણુ બોમ્બના અસ્તિત્વની વાત કરતા હતા, પરંતુ હવે ઈન્ડિયા બ્લોકના વરિષ્ઠ નેતા ફારુક અબ્દુલ્લા પણ આવું જ કહી રહ્યા છે.
રાજનાથ સિંહે શું કહ્યું?
રાજનાથ સિંહે ન્યૂઝ એજન્સી પીટીઆઈને આપેલા ઈન્ટરવ્યુમાં કહ્યું હતું કે, ‘મને લાગે છે કે ભારતને કંઈ કરવાની જરૂર નહીં પડે. જમ્મુ અને કાશ્મીરમાં જે રીતે જમીની સ્થિતિ બદલાઈ છે, આર્થિક પ્રગતિ થઈ છે અને શાંતિ પાછી આવી છે, મને લાગે છે કે પીઓકેના લોકોમાંથી ભારતમાં જોડાવાની માંગ આપોઆપ વધવા લાગશે.
આ પહેલા વિદેશ મંત્રી એસ જયશંકરે પણ કહ્યું હતું કે PoK ક્યારેય ભારતથી અલગ થયું નથી. રવિવારે ઓડિશાના કટકમાં એક કાર્યક્રમ દરમિયાન તેમણે કહ્યું કે PoK ક્યારેય ભારતની બહાર રહ્યું નથી અને તે દેશનો એક ભાગ છે.
