ઉત્તર પૂર્વ અને દક્ષિણ ભારતમાં હાલમાં અતિશય ગરમી પડી રહી છે. ઘણા શહેરોમાં તાપમાન 48 ડિગ્રી સેલ્સિયસને પાર પહોંચી ગયું છે. દિલ્હી અને પશ્ચિમ ઉત્તર પ્રદેશ સહિત પાંચ રાજ્યોમાં છેલ્લા બે અઠવાડિયાથી ભારે ગરમીએ વિનાશ વેર્યો છે, જેના કારણે લોકોના મોત પણ થઈ રહ્યા છે. બંગાળની ખાડી પર બનેલું લો પ્રેશર વધુ તીવ્ર બને તેવી શક્યતા છે, જેના કારણે તે ચક્રવાતી તોફાનમાં ફેરવાઇ શકે છે.
ભારતીય હવામાન વિભાગે માહિતી આપી હતી કે આ તોફાન 25 મેની સાંજ સુધીમાં બંગાળની ખાડીમાં ત્રાટકે તેવી શક્યતા છે. રવિવારે ચક્રવાતને કારણે 102 કિલોમીટર પ્રતિ કલાકની ઝડપે પવન ફૂંકાઈ શકે છે.
IMDએ માછીમારોને 24 મે સુધી દક્ષિણ બંગાળની ખાડી, 26 મે સુધી મધ્ય બંગાળની ખાડી અને 24 મેથી 27 મે સુધી ઉત્તર બંગાળની ખાડીમાં ન જવાની સલાહ આપી હતી. પશ્ચિમ બંગાળ, ઉત્તર ઓડિશા, મિઝોરમ, ત્રિપુરા અને દક્ષિણ મણિપુરમાં 26 અને 27 મેના રોજ ભારે વરસાદની આગાહી કરવામાં આવી છે.
જાણો કેવું રહેશે ચોમાસું?
ભારતીય હવામાન વિભાગના જણાવ્યા અનુસાર, ભારતમાં આ વર્ષે જૂન અને સપ્ટેમ્બર વચ્ચે સામાન્ય ચોમાસું રહેવાની ધારણા છે. દેશમાં 868.6 મીમીના લાંબા ગાળાના સરેરાશ વરસાદના 102 ટકા વરસાદની અપેક્ષા છે. રિપોર્ટ અનુસાર, જૂનથી સપ્ટેમ્બર દરમિયાન મધ્ય અને પશ્ચિમ ભાગોમાં સામાન્ય કરતાં વધુ વરસાદ પડશે. ઉત્તર અને દક્ષિણ ભાગોમાં સામાન્ય વરસાદ અને ઉત્તર-પૂર્વ ભારત અને પૂર્વીય ભાગોમાં સામાન્ય કરતાં ઓછો વરસાદ પડશે.
