Today Gujarati News (Desk)
સુપ્રીમ કોર્ટે લખીમપુર ખેરી હિંસા કેસની તપાસ કરી રહેલી SITને ભંગ કરી દીધી છે. સુપ્રીમ કોર્ટે કહ્યું કે તપાસ પૂર્ણ થઈ ગઈ છે અને ટ્રાયલ ચાલી રહી છે. સુપ્રીમ કોર્ટે એસઆઈટીની તપાસ પર દેખરેખ રાખતા હાઈકોર્ટના નિવૃત્ત જજ રાકેશ કુમાર જૈનને પણ મોનિટરિંગના કામમાંથી રાહત આપી છે. તમને જણાવી દઈએ કે 3 ઓક્ટોબર, 2021ના રોજ લખીમપુર ખેરીમાં થયેલી હિંસામાં આઠ લોકોએ જીવ ગુમાવ્યા હતા, જેમાંથી ચાર ખેડૂતો હતા.
ત્રણ વરિષ્ઠ અધિકારીઓ SITનો ભાગ હતા
લખીમપુર ખેરી જિલ્લાના ટિકુનિયામાં થયેલી આ હિંસામાં કેન્દ્રીય મંત્રી અજય કુમાર મિશ્રાના પુત્ર આશિષ મિશ્રા મુખ્ય આરોપી છે. સોમવારે સુનાવણી દરમિયાન જસ્ટિસ સૂર્યકાન્ત અને જસ્ટિસ દીપાંકર દત્તાની ખંડપીઠે SITને વિખેરી નાખવાનો આદેશ આપતાં કહ્યું હતું કે, જો SITની પુનઃરચના કરવાની જરૂર જણાશે તો આ અંગે યોગ્ય આદેશ આપવામાં આવશે. ત્રણ વરિષ્ઠ IPS અધિકારી એસબી શિરોડકર, દીપેન્દ્ર સિંહ અને પદ્મજા ચૌહાણ આ SITનો ભાગ હતા.
શું બાબત હતી
લખીમપુર ખેરીના ખેડૂતો ઉત્તર પ્રદેશના નાયબ મુખ્યમંત્રી કેશવ પ્રસાદ મૌર્યની મુલાકાતનો વિરોધ કરી રહ્યા હતા. આ દરમિયાન એક SUVએ વિરોધ કરી રહેલા ખેડૂતોને કચડી નાખ્યા હતા. જેમાં ચાર ખેડૂતોના મોત થયા હતા. આ પછી ગુસ્સે થયેલા લોકોએ એસયુવીના ડ્રાઈવર અને ભાજપના બે કાર્યકર્તાઓને માર માર્યો હતો. આ હિંસામાં એક પત્રકારનું પણ મોત થયું હતું. આ ઘટનાને લઈને વિપક્ષ અને ખેડૂત સંગઠનો દ્વારા ભારે હોબાળો થયો હતો. સુપ્રીમ કોર્ટે 11 જુલાઈના રોજ મુખ્ય આરોપી આશિષ મિશ્રાને વચગાળાના જામીન પર મુક્ત કરવાનો આદેશ આપ્યો હતો, જે 26 સપ્ટેમ્બર સુધી લંબાવવામાં આવ્યો હતો.
આ કેસમાં આશિષ મિશ્રા સહિત કુલ 13 આરોપી છે. આશિષ મિશ્રા ઉપરાંત અન્ય આરોપીઓમાં અંકિત દાસ, નંદન સિંહ બિષ્ટ, લતીફ કાલે, સત્યમ ઉર્ફે સત્ય પ્રકાશ ત્રિપાઠી, શેખર ભારતી, સુમિત જયસ્વાલ, આશિષ પાંડે, લવકુશ રાણા, શિશુપાલ, ઉલ્લાસ કુમાર ઉર્ફે મોહિત ત્રિવેદી, રિંકુ બંજા રાણા અને ધર્મેન્દ્રનો સમાવેશ થાય છે. સમાવેશ થાય છે.
