Today Gujarati News (Desk)
દેશના વિવિધ સરહદી વિસ્તારોમાં તૈનાત સૈનિકોની સાથે સ્થાનિક લોકોએ બુધવારે રક્ષાબંધનના તહેવારની ઉજવણી કરી હતી. પચાસ યુનિવર્સિટી અને કોલેજના વિદ્યાર્થીઓ ચીનની સરહદે આવેલા સિક્કિમના નાથુલા પહોંચ્યા અને સેનાના જવાનો સાથે રક્ષાબંધનની ઉજવણી કરી. વિદ્યાર્થીઓએ સૈનિકોના કાંડા પર રાખડી બાંધી અને મીઠાઈ વહેંચી.
બીજી તરફ જમ્મુના આરએસ પુરા સેક્ટરમાં વિદ્યાર્થીનીઓએ BSF જવાનોના કાંડા પર રાખડી બાંધી હતી. વધુમાં, વિદ્યાર્થીઓએ કેન્દ્રની વાઈબ્રન્ટ વિલેજ યોજના હેઠળ સોમગો ગામના રહેવાસીઓ સાથે વાર્તાલાપ કર્યો.
ભારત-ચીન સરહદે આવેલા ગામોના સર્વાંગી વિકાસ માટે અને આ વિસ્તારોમાં લોકોના જીવનની ગુણવત્તા સુધારવા માટે કેન્દ્રીય બજેટ 2022-23માં વાઈબ્રન્ટ વિલેજ પ્રોગ્રામની જાહેરાત કરવામાં આવી હતી.
રાખડી બાંધવા બદલ વિદ્યાર્થિનીઓને સજા ન કરો: NCPCR
નેશનલ કમિશન ફોર પ્રોટેક્શન ઓફ ચાઈલ્ડ રાઈટ્સ (NCPCR) એ શાળાઓને રક્ષાબંધન દરમિયાન શાળાઓમાં વિદ્યાર્થીઓને રાખડી બાંધવા, તિલક અને મહેંદી લગાવવા બદલ સજા ન કરવા જણાવ્યું છે. NCPCRએ આ માટે તમામ રાજ્યોને પત્ર લખ્યો છે.
