Today Gujarati News (Desk)
ઉત્તર કોરિયાના તાનાશાહ કિમ જોંગ ઉને નવો ગુપ્ત આદેશ આપ્યો છે. જેમાં તેણે આત્મહત્યા પર પ્રતિબંધનો આદેશ આપ્યો છે. મળતી માહિતી મુજબ કિમ જોંગ ઉને આત્મહત્યા પર પ્રતિબંધ લગાવવાનો આદેશ આપ્યો છે અને તેને સમાજવાદ વિરુદ્ધ દેશદ્રોહ ગણાવ્યો છે. રેડિયો ફ્રી એશિયાના રિપોર્ટમાં દાવો કરવામાં આવ્યો છે કે કિમ જોંગ ઉને ઈમરજન્સી મીટિંગ દરમિયાન આત્મહત્યા રોકવાનો નિર્ણય લીધો હતો.
છેલ્લા એક વર્ષમાં આત્મહત્યાના વધી રહેલા મામલાઓને ધ્યાનમાં રાખીને આ નિર્ણય લેવામાં આવ્યો છે. ગયા વર્ષની સરખામણીએ આ વર્ષે આપઘાતના કેસોમાં 40 ટકાનો વધારો થયો છે, જેના કારણે અધિકારીઓમાં ચિંતાનો માહોલ છે. જો કે અધિકારીઓ દ્વારા આ આંકડાની પુષ્ટિ કરવામાં આવી નથી.
ઈમરજન્સી મીટીંગમાં ઓર્ડર આપવામાં આવ્યો
એવો દાવો કરવામાં આવ્યો છે કે આત્મહત્યાના કેસમાં વધારાને ધ્યાનમાં રાખીને અધિકારીઓની ઇમરજન્સી બેઠક બોલાવવામાં આવી હતી. જેમાં કિમ જોંગ ઉને પણ ભાગ લીધો હતો. આ બેઠક દરમિયાન જ તેણે આત્મહત્યા પર રોક લગાવવાનું નક્કી કર્યું. તે જ સમયે, દક્ષિણ કોરિયાની રાષ્ટ્રીય ગુપ્તચર સેવાના પ્રવક્તાએ જણાવ્યું છે કે ઉત્તર કોરિયામાં વધતી જતી આંતરિક અશાંતિ લોકોની સમસ્યાઓનું કારણ છે. આ ઉપરાંત દેશમાં હિંસક ગુનાઓ પણ ઝડપથી વધી રહ્યા છે જેના કારણે લોકોને સંઘર્ષ કરવો પડે છે.
આ વર્ષે આત્મહત્યાના 35 કેસ
માહિતી આપતાં એક અધિકારીએ જણાવ્યું કે આ બેઠક પ્રાંતીય પાર્ટી કમિટીના કાર્યાલયમાં થઈ હતી, જેમાં ઘણા મોટા નેતાઓએ ભાગ લીધો હતો. આ બેઠકમાં કિમ જોંગ ઉને આત્મહત્યા પર પ્રતિબંધ લગાવવાનો આદેશ આપ્યો હતો. અધિકારીએ કહ્યું કે આ વર્ષે જ ચોંગજિન અને નજીકના ક્યોંગસોંગ કાઉન્ટીમાં આત્મહત્યાના 35 કેસ નોંધાયા છે. નોર્થ હેમગ્યોંગની બેઠકમાં પણ આ આંકડો રજૂ કરવામાં આવ્યો હતો. અધિકારીના જણાવ્યા અનુસાર, આમાંના મોટા ભાગના મામલા એવા હતા જેમાં સમગ્ર પરિવાર એક સાથે આત્મહત્યા કરી રહ્યો હતો.
