Today Gujarati News (Desk)
યુએસમાં કેલિફોર્નિયાની એક અદાલતે 2008ના મુંબઈ આતંકી હુમલાના જેલમાં બંધ આરોપી તહવ્વુર રાણાના પ્રત્યાર્પણને મંજૂરી આપી છે. ભારતે પાકિસ્તાની મૂળના આ કેનેડિયન બિઝનેસમેનના પ્રત્યાર્પણની માંગ કરી હતી.
ન્યાયાધીશ જેકલીન ચુલજિયનની અદાલતે 16 મેના આદેશમાં જણાવ્યું હતું કે 62 વર્ષીય રાણા એ ગુનાઓ માટે પ્રત્યાર્પણપાત્ર છે જેના માટે તેના પ્રત્યાર્પણની વિનંતી કરવામાં આવી હતી. નેશનલ ઇન્વેસ્ટિગેશન એજન્સી (NIA) પાકિસ્તાન સ્થિત આતંકી સંગઠન લશ્કર-એ-તૈયબાના આતંકવાદીઓ દ્વારા 2008ના મુંબઈ હુમલામાં રાણાની ભૂમિકાની તપાસ કરી રહી છે.
આ હુમલાઓમાં તેની ભૂમિકા બદલ ભારતની પ્રત્યાર્પણની વિનંતી પર યુએસ દ્વારા રાણાની ધરપકડ કરવામાં આવી હતી. NIAએ કહ્યું છે કે તે રાજદ્વારી માધ્યમો દ્વારા તેને ભારત લાવવાની પ્રક્રિયા શરૂ કરવા માટે તૈયાર છે.
કોર્ટની સુનાવણી દરમિયાન, ફેડરલ પ્રોસિક્યુટર્સે દલીલ કરી હતી કે રાણાને ખબર હતી કે તેનો બાળપણનો મિત્ર, પાકિસ્તાની-અમેરિકન ડેવિડ કોલમેન હેડલી, લશ્કર-એ-તૈયબા સાથે જોડાયેલો હતો.
હેડલીને મદદ કરીને અને તેની ગતિવિધિઓને ઢાંકીને રાણા આતંકવાદી સંગઠન અને તેની સાથે જોડાયેલા લોકોને મદદ કરતો હતો. રાણા હેડલીની મીટિંગ, ચર્ચાઓ અને કેટલાક ટાર્ગેટ સહિત હુમલાના પ્લાનિંગથી વાકેફ હતો.
.jpeg "Mumbai Attack: તહવ્વુર રાણાના પ્રત્યાર્પણનો રસ્તો સાફ, યુએસ કોર્ટે આપી ભારત લાવવાની મંજૂરી 3")
યુએસ સરકારે ભારપૂર્વક જણાવ્યું હતું કે રાણા કાવતરાનો ભાગ હતો અને તેણે આતંકવાદી કૃત્ય આચરવાનો ગુનો કર્યો હતો. બીજી તરફ રાણાના વકીલે પ્રત્યાર્પણનો વિરોધ કર્યો હતો. યાદ કરો કે 26/11ના મુંબઈ આતંકી હુમલામાં છ અમેરિકન સહિત કુલ 166 લોકો માર્યા ગયા હતા.
