Today Gujarati News (Desk)
વડાપ્રધાન નરેન્દ્ર મોદીએ ગુજરાતમાં આશરે રૂ. 4,400 કરોડના મૂલ્યના વિવિધ પ્રોજેક્ટનું ઉદ્ઘાટન અને શિલાન્યાસ કર્યો હતો. આ સાથે તેઓ કેન્દ્ર સરકારની આવાસ યોજના હેઠળ બનેલા મકાનો 19,000 લાભાર્થીઓને ફાળવશે.
આ દરમિયાન વડાપ્રધાન નરેન્દ્ર મોદીએ તેમના સંબોધનમાં કહ્યું કે હું ફરી એકવાર તમામ લાભાર્થીઓને, ખાસ કરીને તે બહેનોને અભિનંદન આપું છું જેમને આજે પોતાનું કાયમી ઘર મળ્યું છે. ગુજરાતમાં ફરીથી ભાજપની સરકાર બનીને થોડા મહિના જ થયા છે, પરંતુ જે ગતિએ વિકાસ થયો છે તે જોઈને હું ખૂબ જ ખુશ છું.
પીએમ મોદીએ કહ્યું કે આજે અમારી સરકાર દરેક અભાવને દૂર કરીને દરેક ગરીબ સુધી પહોંચવાનું કામ કરી રહી છે.
અમારી સરકાર લાભાર્થીઓ સુધી પહોંચવા માટે ન તો જાતિ જોતી કે ન તો ધર્મ. કારણ કે મને લાગે છે કે જ્યાં કોઈ ભેદભાવ નથી ત્યાં જ સાચી બિનસાંપ્રદાયિકતા છે.
તેમણે વધુમાં જણાવ્યું હતું કે અગાઉ રિયલ એસ્ટેટ ક્ષેત્રમાં મનમાની ચાલતી હતી, છેતરપિંડીની ફરિયાદો આવતી હતી. મધ્યમ વર્ગના પરિવારોને રક્ષણ આપવા માટે કોઈ કાયદો નહોતો. અમે RERA કાયદો ઘડ્યો, તેનાથી મધ્યમ વર્ગના પરિવારોને સુરક્ષા મળી છે.
પીએમ મોદીએ કહ્યું કે ‘પીએમ આવાસ યોજના’ મહિલા સશક્તિકરણની સાથે ગરીબોને મોટી તાકાત આપી રહી છે. છેલ્લા 9 વર્ષમાં ગરીબ પરિવારોને લગભગ 4 કરોડ પાકાં મકાનો આપવામાં આવ્યા છે. આમાંથી લગભગ 70% મકાનો મહિલા લાભાર્થીઓના નામે છે.
