Today Gujarati News (Desk)
જમ્મુ-કાશ્મીરમાં આતંકવાદીઓ વિરુદ્ધ સુરક્ષાદળોનું ઓપરેશન સતત ચાલુ છે. શુક્રવારે ફરી એકવાર સુરક્ષાદળોએ બે આતંકીઓને ઠાર કર્યા છે. જમ્મુ-કાશ્મીરના રાજૌરીમાં સુરક્ષાદળો અને આતંકવાદીઓ વચ્ચેની અથડામણમાં બે આતંકવાદીઓ માર્યા ગયા છે. સુરક્ષા દળોએ રાજૌરીમાં આતંકીઓને ઘેરી લીધા હતા.
શુક્રવારે રાજૌરી જિલ્લાના કાંડી વિસ્તારમાં સર્ચ ઓપરેશન દરમિયાન આતંકવાદીઓ અને સુરક્ષા દળો વચ્ચે અથડામણ થઈ હતી. જવાનોએ ચાર્જ સંભાળી લીધો અને આ એન્કાઉન્ટરમાં બે આતંકીઓને ઠાર કર્યા. જણાવી દઈએ કે આ એન્કાઉન્ટરમાં સેનાનો એક અધિકારી ઘાયલ થયો છે. ઘાયલ અધિકારીને તાત્કાલિક સારવાર માટે હોસ્પિટલમાં દાખલ કરવામાં આવ્યા હતા. હાલ આ વિસ્તારમાં સર્ચ ઓપરેશન ચાલી રહ્યું છે.
ઉલ્લેખનીય છે કે, પૂંચમાં આતંકી હુમલા બાદથી ખીણમાં આતંકીઓ વિરુદ્ધ સેનાની કાર્યવાહી સતત ચાલી રહી છે. બુધવાર, ગુરુવાર અને હવે શુક્રવારે સુરક્ષાદળોએ આતંકીઓ વિરુદ્ધ ઓપરેશન હાથ ધર્યું છે. ઘાટીમાં આતંકી હુમલાના ઇનપુટ બાદ સેનાએ સતત મોટાપાયે સર્ચ ઓપરેશન હાથ ધર્યું છે. એલર્ટ મોડમાં સેના સતત આતંકીઓનો ખાત્મો કરી રહી છે.
ગુરુવારે આતંકવાદી હુમલો થયો હતો
ઘાટીમાં આતંકવાદીઓ સતત સુરક્ષા દળો અને પોલીસકર્મીઓને નિશાન બનાવી રહ્યા છે. દક્ષિણ કાશ્મીરના અનંતનાગ જિલ્લાના બિજબેહારા વિસ્તારમાં ગુરુવારે થયેલો આતંકી હુમલો. આતંકવાદીઓએ પોલીસ દળ પર હુમલો કર્યો જેમાં એક પોલીસકર્મી પણ ઘાયલ થયો. આ ઘટના બાદ હજુ સુધી એ જાણી શકાયું નથી કે આતંકીઓ હાલમાં ક્યાં છે. હુમલા બાદ પોલીસ દળોએ આતંકીઓને પકડવા માટે સર્ચ ઓપરેશન પણ શરૂ કર્યું હતું.
