Today Gujarati News (Desk)
ઉત્તરાખંડના હરિદ્વારમાં આવેલા બહાદરાબાદમાં ગંભીર ઘટના બની છે. અહીં એક ફુલ સ્પીડે આવેલી સ્કોર્પિયો કારે ગીતોની ધૂન પર ડાન્સ કરી રહેલા જાનૈયાઓને કચડ્યા છે. આ ઘટનામાં એકનું મોત નિપજ્યું છે, જ્યારે 31 જાનૈયાઓ ઈજાગ્રસ્ત થયા છે. હાલ આ ઘટનાનો વીડિયો સોશિયલ મીડિયા પર વાયરલ થયો છે. વીડિયોમાં જોવા મળી રહ્યું છે કે, એક વરઘોડામાં જાનૈયાઓ મોજમસ્તીથી ડાન્સ કરી રહ્યા છે. આ દરમિયાન ફુલ સ્પીડે આવેલી સ્કોર્પીયો કાર આ વરઘોડાને કચડી નાખે છે.
હરિદ્વારના બહાદરાબાદમાં બનેલી આ ગંભીર ઘટનામાં જાનૈયાઓએ તુરંત કાર ચાલકને પકડ્યો હતો અને ડ્રાઈવરનો જોરદાર ધોલાઈ કરી હતી. મળતી માહિતી મુજબ કાર ચાલક ભારતીય કિસાન યૂનિયનનો નેતા હોવાનું કહેવાઈ રહ્યું છે. આ તમામ ઈજાગ્રસ્તોને હોસ્પિટલમાં દાખલ કરવામાં આવ્યા છે, જ્યારે એક ગંભીર ઈજાગ્રસ્તને ઋષિકેશ એમ્સમાં દાખલ કરાયો છે.
