Today Gujarati News (Desk)
અમદાવાદઃ જાન્યુઆરીના મધ્યમાં આકરી ઠંડી પડ્યા પછી હવે રાજ્યના હવામાનમાં ધીમે-ધીમે ફેરફાર થઈ રહ્યો છે. આમ છતાં રાતના સમયે તાપમાનમાં મોટો ઘટાડો નોંધાઈ રહ્યો છે. આગામી પાંચ દિવસ સુધી તાપમાનમાં ભારે ઘટાડાની સંભાવના વ્યક્ત કરવામાં આવી નથી, હવામાન વિભાગે રાજ્યનું હવામાન મોટા ફેરફાર વગરનું રહેવાની સંભાવના વ્યક્ત કરી છે. રાજ્યમાં રાતના તાપમાનમાં પણ આગામી સમયમાં ધીમે-ધીમે વધારો થવાની પણ શરુઆત થશે. ઠંડી હજુ ફેબ્રુઆરી મહિના સુધી રહેશે અને તે પછી તાપમાનમાં વધારો થવાની શરુઆત થઈ જશે.
વધુમાં મોનોરમા મોહંતીએ જણાવ્યું છે કે, “હાલ જે સમય ચાલી રહ્યો છે તેમાં લઘુત્તમ તાપમાનમાં વધારો થશે, રાત્રી દરમિયાન પડતી ઠંડીમાં આગામી પાંચ દિવસમાં ઘટાડો થતો જશે.” એટલે કે ફેબ્રુઆરી આગળ વધવાની સાથે ઠંડીનું જોર સાવ ઘટી જશે.
હાલ એક વેસ્ટર્ન ડિસ્ટર્બન્સનો અપ્રોચ થઈ રહ્યો છે, પરંતુ તેની ગુજરાત પર ખાસ અસર નહીં રહે પરંતુ તેના કારણે ભેજ વધશે અને ઠંડીમાં ઘટાડો થશે. રાજ્યમાં કેટલીક જગ્યા પર તાપમાનમાં એકાદ ડિગ્રીનો ઘટાડો થઈ શકે છે આ સિવાય કોઈ મોટા ફેરફારની સંભાવના નથી.
અમદાવાદમાં 14 ડિગ્રી, ગાંધીનગરમાં 13 અને ભૂજમાં 6 ડિગ્રી લઘુત્તમ તાપમાન નોંધાયું છે પરંતુ આગામી દિવસમાં તેમાં વધારો થવાની સંભાવના હવામાન વિભાગ દ્વારા વ્યક્ત કરવામાં આવી છે. હવામાન વિભાગે હાલ પાંચ દિવસ માટે લઘુત્તમ તાપમાન વધ્યા બાદ બહુ મોટા ફેરફાર નહીં થવાની સંભાવના વ્યક્ત કરવામાં આવી છે.
અમદાવાદના હવામાન વિભાગના વડા મનોરમા મોહંતીએ રાજ્યમાં ઠંડીની આગાહી કરતા જણાવ્યું છે કે, “ગુજરાતમાં આગામી પાંચ દિવસ હવામાન સૂકું રહેવાની આગાહી છે. રાજ્યમાં વરસાદ થવાની સંભાવના નથી. લઘુત્તમ અને મહત્તમ તાપમાનમાં કંઈ મોટો ઘટાડો થવાની સંભાવના નથી. પરંતુ તાપમાન 2-3 ડિગ્રીનો વધારો થઈ શકે છે.”
ઠંડીનું પ્રમાણ ફેબ્રુઆરી સુધી રહેશે અને માર્ચથી તાપમાનમાં વધારો થવાની આગાહી હવામાન વિભાગ દ્વારા વ્યક્ત કરવામાં આવી છે. ફેબ્રુઆરીના અંતિમ ભાગથી ઠંડીનું પ્રમાણ ઘટતું જશે અને ગરમીનું જોર વધવાનું શરુ થશે.
અંબાલાલની આગાહીઃ અંબાલાલ પટેલે હવે ધીમે-ધીમે રાજ્યમાં ઠંડીના જોરમાં ઘટાડો થવાની આગાહી કરી છે. જેમાં તેમણે માર્ચ સુધીમાં મહત્તમ તાપમાનનો પારો 40 ડિગ્રીએ પહોંચી જવાની સંભાવના વ્યક્ત કરી છે. ફેબ્રુઆરીના બીજા સપ્તાહથી ગરમી જોર પકડશે અને મહત્તમ તાપમાન 36 ડિગ્રી આસપાસ પહોંચી જશે.આ પછી 19 થી 20 ફેબ્રુઆરીએ મહત્તમ તાપમાન વધતું જશે. અને ફેબ્રુઆરીના અંત સુધીમાં મહત્તમ તાપમાન 38 ડિગ્રી થઈ થવાની શકયતા રહેશે.
