Today Gujarati News (Desk)
કારગિલ વિસ્તારમાંથી ગુમ થયેલી 28 વર્ષની મહિલાનો મૃતદેહ ગિલગિટ-બાલ્ટિસ્તાનમાંથી મળી આવ્યો છે. આથી ખળભળાટ મચી ગયો છે. હવે સવાલ એ છે કે મહિલાની લાશ ત્યાં કેવી રીતે પહોંચી. મળતી માહિતી મુજબ કેટલાક લોકોએ મહિલાની લાશને નદીમાં તરતી જોઈ હતી. આ પછી સ્થાનિક પોલીસને જાણ કરવામાં આવી હતી. પોલીસે લાશને નદીમાંથી બહાર કાઢી હતી. ત્યારબાદ, મૃતદેહની ઓળખ કારગીલમાંથી ગુમ થયેલી ભારતીય મહિલા તરીકે થઈ હતી.
આ મહિલા લદ્દાખના કારગિલ જિલ્લામાંથી ગુમ થઈ હતી. બુધવારે આ મહિલાનો મૃતદેહ ગિલગિટ-બાલ્ટિસ્તાન વિસ્તારમાંથી મળી આવ્યો હતો. પોલીસે આ માહિતી આપી હતી. ડોન અખબારે ખરમંગ જિલ્લાના ડેપ્યુટી કમિશનર મુહમ્મદ જાફરને ટાંકીને જણાવ્યું હતું કે કારગિલ નદીમાંથી મહિલાનો મૃતદેહ મળી આવ્યો હતો અને જિલ્લામાં દફનાવવામાં આવ્યો હતો. આ પહેલા કારગિલ પોલીસ સ્ટેશને મહિલાની તસવીર સાથેનું પેમ્ફલેટ ફરતું કર્યું હતું.
સ્થાનિક લોકો દ્વારા દફનાવવામાં આવ્યા હતા
મૃતદેહને રિકવર કરવા માટે ગિલગિટ-બાલ્ટિસ્તાન પ્રશાસનને પેમ્ફલેટ પણ મોકલવામાં આવ્યું હતું. જેમાં મહિલાની ઓળખ બિલકિસ બાનો તરીકે થઈ છે. તે 15 જુલાઈના રોજ અચ્છમાલ સ્થિત તેના ઘરેથી ગુમ થઈ ગઈ હતી. તે જ જિલ્લામાં સ્થાનિક લોકોએ મૃતદેહના અંતિમ સંસ્કાર કર્યા છે. ખરમંગના રહેવાસી કાસિમે જણાવ્યું હતું કે મહિલાના અંતિમ સંસ્કાર ઇસ્લામિક વિધિ અનુસાર કરવામાં આવ્યા હતા. જો કે મહિલાની લાશ કયા સંજોગોમાં અહીં પહોંચી તે અંગે કોઈ માહિતી નથી.
