ભારતે છેલ્લા ઘણા વર્ષોથી આંતરરાષ્ટ્રીય પ્રતિબંધોનો સામનો કરી રહેલા દક્ષિણ અમેરિકન દેશ વેનેઝુએલાના તેલ બજારમાં પરત આવવાનું સ્વાગત કર્યું છે અને સંકેત આપ્યો છે કે તે તેની પાસેથી તેલની ખરીદી શરૂ કરવા માટે પણ તૈયાર છે. કેન્દ્રીય પેટ્રોલિયમ અને કુદરતી ગેસ મંત્રી હરદીપ સિંહ પુરીએ કહ્યું-
ભારત હંમેશા વેનેઝુએલાના ક્રૂડની ખરીદી કરતું આવ્યું છે. પ્રતિબંધના કારણે જ ભારતે તેની પાસેથી તેલ ખરીદવાનું બંધ કરી દીધું છે. ભારતમાં ઘણી રિફાઇનરીઓ ભારે ક્રૂડનો ઉપયોગ કરવા સક્ષમ છે. અમે ફરીથી ખરીદી કરીશું.
વેનેઝુએલા 3 વર્ષ પછી ઓઇલ માર્કેટમાં પરત ફર્યું
ભારતે વર્ષ 2020માં વેનેઝુએલા પાસેથી ક્રૂડ ખરીદવાનું બંધ કરી દીધું હતું. ત્યારબાદ અમેરિકાના નેતૃત્વમાં તેના પર આંતરરાષ્ટ્રીય પ્રતિબંધ લગાવવામાં આવ્યો હતો. જોકે, ભારત પ્રતિબંધોની અવગણના કરીને રશિયા પાસેથી સતત ક્રૂડની ખરીદી કરી રહ્યું છે. વેનેઝુએલાના લગભગ ત્રણ વર્ષ બાદ ઓઇલ માર્કેટમાં વાપસીની અસર ક્રૂડ ઓઇલ પર પણ પડી રહી છે અને તેનો સીધો ફાયદો ભારતને પણ થઇ રહ્યો છે.
ક્રૂડના ભાવ ઘટ્યા
ઓઈલ ઉત્પાદક દેશોના સંગઠન ઓપેક દ્વારા ઉત્પાદનમાં કાપ મુકવા છતાં અને શિયાળાની માંગમાં વધારો થવા છતાં આંતરરાષ્ટ્રીય બજારમાં ક્રૂડના ભાવ નીચે આવી રહ્યા છે. બે અઠવાડિયા પહેલા પ્રતિ બેરલ 88 ડોલરની કિંમત હવે બેરલ દીઠ 72-73 ડોલરની આસપાસ છે.
ભારત વિદેશી બજાર પર નિર્ભર છે
ભારત તેની 87 ટકા ક્રૂડ જરૂરિયાતો બહારથી લે છે. અહીં ક્રૂડના ભાવ અર્થવ્યવસ્થાની દિશા નક્કી કરવામાં ખૂબ મહત્વની ભૂમિકા ભજવે છે. આવી સ્થિતિમાં એવું કહેવામાં આવી રહ્યું છે કે સસ્તું ક્રૂડ ભારતીય અર્થવ્યવસ્થાને વધુ મજબૂત કરશે.
