Today Gujarati News (Desk)
રાષ્ટ્રવાદી કોંગ્રેસ પાર્ટી (NCP)ના આગામી અધ્યક્ષ કોણ હશે તેના પર સસ્પેન્સ યથાવત છે. એનસીપીના કાર્યકરો સતત શરદ પવારને એનસીપી પ્રમુખ તરીકે ચાલુ રાખવાની માંગ કરી રહ્યા છે. પવારે ગુરુવારે કહ્યું કે તેઓ આગામી થોડા દિવસોમાં અંતિમ નિર્ણય લેશે. એવું કહેવામાં આવી રહ્યું છે કે શરદ પવારની પુત્રી અને સાંસદ સુપ્રિયા સુલે અથવા પૂર્વ ડેપ્યુટી સીએમ અજિત પવાર પાર્ટીના આગામી અધ્યક્ષ બની શકે છે.
એનસીપીના નવા રાષ્ટ્રીય અધ્યક્ષના નામ પર વિચારણા કરવા માટે આજે કમિટીની બેઠક યોજાશે. શરદ પવારે પ્રમુખની પસંદગી માટે 18 સભ્યોની સમિતિ બનાવી હતી.
સમિતિ શરદ પવારને તેમના રાજીનામા પર પુનર્વિચાર કરવા માટે કહી શકે છે. અથવા નવા પ્રમુખના નામની જાહેરાત પણ થઈ શકે છે. પવારને કાર્યકારી પ્રમુખ તરીકે નિયુક્ત કરવા માટે પણ પ્રસ્તાવ લાવવામાં આવી શકે છે.
શરદ પવારે ગુરુવારે કહ્યું કે, તેમણે પાર્ટીના ભવિષ્ય માટે અને નવા નેતૃત્વ માટે તેમના પદ પરથી હટી જવાનો નિર્ણય કર્યો છે. વાયબી ચવ્હાણ કેન્દ્રની બહાર, પવારે કહ્યું કે તેઓ આગામી થોડા દિવસોમાં આખરી નિર્ણય લેશે અને પક્ષના કાર્યકરોની લાગણીઓને અવગણવામાં આવશે નહીં.
પવારના સમર્થકો તેમને પક્ષના વડા તરીકે ચાલુ રાખવાની માંગ સાથે અહીં ધામા નાંખી રહ્યા છે. આ સાથે જ પવારે કાર્યકર્તાઓને કહ્યું કે હું જાણું છું કે તમે મને પાર્ટી અધ્યક્ષ પદ પરથી હટવાનો નિર્ણય લેવા દેતા નથી.
શરદ પવારે કહ્યું કે તેઓ શુક્રવારે મહારાષ્ટ્ર બહારના પક્ષના કેટલાક સાથીદારોને આ મુદ્દે ચર્ચા કરવા માટે મળશે. હું એક-બે દિવસમાં અંતિમ નિર્ણય લઈશ.
એનસીપીના કાર્યકરો કહે છે કે પવારે ઓછામાં ઓછા 2024 સુધી પાર્ટીનું નેતૃત્વ કરવું જોઈએ, કારણ કે લોકસભા અને વિધાનસભાની ચૂંટણીઓ થવાની છે.
શરદ પવારે 2 મેના રોજ એનસીપી અધ્યક્ષ પદેથી રાજીનામું આપી દીધું હતું. પવારે તેમની આત્મકથા ‘લોક માજે સંગાતિ’ (લોકો મારા સાથી છે) ના વિમોચન સમયે રાજીનામાની જાહેરાત કરી હતી.
પવારે કહ્યું હતું કે, ‘રાજ્યસભાના સભ્ય તરીકે મારો ત્રણ વર્ષનો કાર્યકાળ બાકી છે.
આ દરમિયાન હું પાર્ટીમાં કોઈ હોદ્દો લીધા વગર મહારાષ્ટ્ર અને દેશ સાથે જોડાયેલા મહત્વના મુદ્દાઓ પર ધ્યાન આપીશ. 1 મે, 1960ને લાંબો સમય થઈ ગયો છે અને મારે એક પગલું પાછું લેવું જરૂરી છે. હું તમારી સાથે રહીશ, પરંતુ પાર્ટીના વડા તરીકે નહીં.
પવારના રાજીનામાની અચાનક જાહેરાતથી પાર્ટીના કાર્યકરો ચોંકી ઉઠ્યા હતા. પાર્ટીના કેટલાક કાર્યકરો રડવા લાગ્યા. તેમને સમજાવવાનો પ્રયાસ પણ કરવામાં આવ્યો હતો.
ઉદ્ધવ જૂથના પ્રવક્તા સંજય રાઉતે કહ્યું છે કે એનસીપીના રાષ્ટ્રીય અધ્યક્ષ પદેથી રાજીનામું આપવાના શરદ પવારના નિર્ણયની મહાવિકાસ અઘાડી પર કોઈ અસર નહીં થાય. આ NCPનો આંતરિક મામલો છે
